Lukas 7:1-50 – Jesus het gelowiges en twyfelaars lief
Dít is wat my van Jesus so fassineer – Hy laat Hom net deur niks afsit nie, nie eers deur die twyfel van een van die “groot seuns” van Sy tyd nie. En dit laat my net weer besef, dít is die Een wat ons aanbid; dít is die Een wat vir ons intree (Hebr 9:24); dít is die Een wat alles ten goede laat meewerk (Rom 8:28); dít is die Een wat die Begin en Voleinder is van ons geloof (Hebr 12:2).
Let ook op hoe die erns van die siektes van die mense wat Jesus gesond maak toeneem – die slaaf lê op sterwe. Met die weduwee van Nain wek Jesus dan ook die eerste keer iemand uit die dood uit op. Wat vir ons sê: Jesus word nie van stryk gebring deur uitdagings nie – Hy is God.
’n Paar kort opmerkings oor die perikope:
7:1-10
Die geloof van die offisier tref my. Hy was waarskynlik een van die godvresende heidene wat hulle met die Joodse geloof geassosieer het. Jesus se genesing van ‘n afstand af, wys dat Hy inderdaad God is, wat nie aan plek of tyd gebonde is om sy werk te doen nie, soos trouens die opwekking uit die dood ook wys.
7:11-17
Die opwekking van die weduwee se seun, behalwe dat hy dus as broodwinner vir haar sou kon sorg, sou die ingeligte Jode waarskynlik ook kon laat terugdink het aan Elisa wat daar naby – by Sunem (2 Kon 4:18) – ’n vrou se kind uit die dood opgewek het.
7:18-35
Die twyfel van Johannes tref my besonderlik. Dit is juis ná die opwekking van die jong seun dat hy sy kommer uitspreek of Jesus regtig die Een is wat moes kom. Ek hoor daarin dat hy eintlik vra of sy eie bediening – as Voorloper van die Verlosser – aan die verwagtinge voldoen het.
7:36-50
Die verhaal van die sondige vrou wat in Simon, die Fariseër, se huis haar liefde vir Jesus demonstreer, wys nie net die kontrasterende reaksies op Jesus nie, maar ook Sy Goddelike vermoë om sondes te vergewe.
related post
Trackback from your site.
Comments (4)
Chris, oor die twyfel by Johanness die Doper :
Na aanleiding van wat in Jes 61 en 58:6 geskryf staan, is dit moontlik,volgens Bybel Verklaar, dat hy verwag het dat as die Messias kom,alle gevangenis bevry sou word,en hier bevind hy hom dan nog indie tronk.Dit was .toe ons hd deel gedoen het,vir my nogal ‘n aanvaarbare verklaring.Beteken die feit dat jy dit nie nou opgehaal het nie,dat jy dit nie as ‘n moontlikheid sien nie?
Ek dink steeds Johannes het gewonder oor hoe Jesus se boodskap rym met die feit dat hy wat Johannes is in die tronk sit. Wat verder insiggewend is, is dat Jesus in sy antwoord juis die deel van sy missie – om vrylating vir gevangenes uit te roep (Luk 4:18) – uitlaat, wat implisiet vir Johannes gesê het dat Jesus hom nie nou gaan verlos uit die tronk nie. En ons weet Johannes is in die tronk doodgemaak. Dit belig n kant van die evangelie, waar die belofte van verlossing nie in vervulling gaan nie, omdat God iets anders beoog, iets wat in Jesus se dood natuurlik ook die geval was. Hebreers 11 skryf daaroor.
Ek het hierdie week erens raakgelees dat daar ‘n paar mense in daardie tyd voorgegee het om Jesus te wees. Dalk was dit een van die redes vir die vraag in 7:18-35
Jy is reg – nie soseer Jesus as sodanig nie, maar wel die Messias of Verlosser. En dit kan die rede vir die vraag wees, maar dit hang ook saam met die verwagtinge wat daar in elk geval vanuit hulle lees van die Bybel was.