Markus 1:21-31 – Dit is 'n nuwe leer, en dit kom met gesag! Hy gebied selfs die bose geeste, en hulle gehoorsaam hom.

Ek lees steeds soos ‘n vakleerling:

• Wat doen Jesus (doen, dink, sê, reageer, vermy, vra, beveel, uitnooi)?
• Wat moet ek hiermee doen?

Markus

Let op hoe vinnig en doelgerig die verloop van die verhaal steeds vertel word.  Jesus gaan reguit na die sinagoge toe.  Op daardie oomblik manifesteer ‘n bose gees. Jesus spreek hom skerp aan en dryf hom uit.  En dit was nie lank nie of daar is oral oor Hom gepraat.  Na dié sinagoge is die skare saam met Hom reguit na Simon-hulle se huis.  Hulle vertel Hom dadelik van Simon se skoonma se siekte.  En Jesus genees haar onmiddellik.

Let op hoe Jesus se prediking sy genesing voorafgaan.  Genesing is ‘n uitvloeisel van sy prediking en bewys die krag en gesag daarvan.

“Dit is ‘n nuwe leer, en dit kom met gesag!  Hy gebied selfs die bose geeste, en hulle gehoorsaam hom.”

Jesus se lering (didagé) is vir Markus baie belangrik.  Hy noem hom 12 keer ‘n Leraar (bv. 5:35 – Jesus is ook die enigste wat dié titel in Markus het), praat gereeld van sy lering (bv. 2:2 – praat oor sy boodskap) of lerende aktiwiteit (vv. 4:1).

Dit sê vir my, dat ek Hom maar kan glo, dat sy woorde met gesag kom en die wêreld heeltemal verander.  Ek kan my lewe op Hom bou.

Dat die bose geeste (letterlik: onrein geeste – algemene benaming vir duiwels in Jesus se tyd) Jesus by sy menslike en Goddelik (vgl. 2 Kon 4:9 waar Elisa ook so genoem word – dit staan ook in kontras met die onrein geeste) name noem, het te make met die bygeloof van daardie tyd waar jy mag sou kry oor iemand as jy sy volle name gebruik.  Dit het egter geen effek op Jesus nie.  Inteendeel, Hy het mag en gesag oor die bose geeste, en beveel hulle sonder enige besweringsformules of ander rituele om stil te bly en uit die man te gaan.

Let ook op hoe ‘n skare mense Jesus begin volg, sodat Hy gou nie meer openlik in ‘n dorp kon kom nie en buite in die veld moes bly (1:45).

Kapernaum, ‘n groot en besige stad aan die See van Galilea, word die sentrum vanwaar Jesus opereer (2:1; 3:20; Matt 4:13).

Die ander evangelies

Die besetene van Kapernaum

Net Lukas vertel ook die eerste verhaal van die besetene in Kapernaum en nie Matteus nie.  Volgens Lukas het Jesus gereeld daar opgetree.  Die uitdryf van die duiwel volg die klassieke patroon: ontmoeting (1:23), verdediging (1:24), opdrag om uit te gaan (1:25), uitdrywing (1:26), reaksie van die omstanders (1:27).

Die genesing van Petrus se skoonma

Die verhaal vertoon ook die klassieke patroon van ‘n genesingsverhaal: situasie en beskrywing van die siekte (1:29-30), genesing (1:31a,b), bewys van genesing (1:31c).  Die detail van hierdie kortste genesingsverhaal in die evangelies verskil effens.  Markus en Matteus vertel dat Jesus die skoonma se hand geneem het, Markus dat Hy haar ook regop gehelp het, en Lukas weer dat Hy slegs aan die koppenent van die bed gaan staan het en die koors bestraf het.  Dit beïnvloed egter nie die betekenis van die verhaal nie.  Dat sy onmiddellik opstaan en hulle bedien, soos die gasvryheidsgebruike van die tyd vereis het, bewys dat sy volledig gesond geraak het.  Interessant is dat koors as sodanig as ‘n siekte in daardie tyd gereken is.

Sinagoges

Byna alle dorpies in Israel het sinagoges gehad wat nie net gedien het as plekke van aanbidding nie maar ook as skole.  Die gebruik dateer uit die tyd van Esra (ongeveer 450 v.C.).  In die week is seuns in die wet en die Joodse godsdiens onderrig (dogters kon dit nie bywoon nie) en op die sabbat is die Woord aan die gemeenskap verkondig.  Omdat elke sinagoge nie hulle eie rabbi gehad het nie, is besoekende rabbis gevra om te preek.  Dit is waarom Jesus en later ook Paulus so geredelik toegang tot die Joodse gemeenskappe gehad het (vgl Hand 13:35).